Cobalt sotuvi 40 foizga quladi
Chevrolet Cobalt endi navbatda turib olinadigan avtomobil emas. Mashina salonlarda erkin sotilyapti, kredit va bo‘lib to‘lash imkoniyatlari ham bor. Shunga qaramay, O‘zbekistonning eng ommaviy avtomobili xaridor yo‘qotishda davom etmoqda.
2026-yilning yanvar-iyun oylarida 40 936 dona Cobalt sotildi. Bir yil avval bu ko‘rsatkich 67 580 dona edi. Yarim yil ichida model savdosi 26 644 donaga, qariyb 40 foizga kamaydi.
Ayni paytda xaridorlar qimmatroq modellarga ko‘proq qiziqa boshladi. Onix sotuvi 2,25 baravar oshdi, Tracker va Kia Sonet 20 foizdan ko‘proq o‘sdi. BYD zavodining savdosi esa 75 foizga ko‘paydi.
Chevroletdan boshqa ishlab chiqaruvchilar birgalikda qariyb 30 foiz o‘sdi. Chevrolet esa 4,2 foiz pasaydi. Natijada brendning O‘zbekiston bozoridagi ulushi 82,4 foizdan 77,6 foizga tushdi.
Bozor o‘smadi, xaridorning tanlovi o‘zgardi
«O‘zavtosanoat» ma’lumotlariga ko‘ra, 2026-yilning birinchi yarmida O‘zbekistonda 175 374 dona avtomobil sotilgan. O‘tgan yilning shu davrida 172 258 dona mashina realizatsiya qilingan edi.
Bir qarashda bozor o‘sgandek: farq 3 116 dona yoki 1,8 foiz. Ammo ishlab chiqaruvchilar kesimida qaralganda, vaziyat butunlay boshqacha ko‘rinadi.
Rasmiy statistikada UzAuto Motors va UzAuto Khorezm alohida korxona sifatida ko‘rsatilgan. Aslida ikkala zavod ham Chevrolet avtomobillarini ishlab chiqaradi. Shu sababli ularning natijalarini birga hisoblash to‘g‘riroq.
2025-yilning birinchi yarmida ikki korxona jami 141 969 dona Chevrolet sotgan. 2026-yilda bu ko‘rsatkich 136 072 donaga tushdi. Bir yil ichida Chevrolet 5 897 dona savdoni yo‘qotdi.
Qolgan ishlab chiqaruvchilar savdosi esa 30 289 donadan 39 302 donaga yetdi. Ya’ni Chevroletdan tashqari bozor qariyb 30 foiz o‘sdi.
Demak, umumiy bozor Chevrolet hisobiga emas, uning pasayishiga qaramay o‘sdi. Milliy ishlab chiqaruvchining yo‘qotgan hajmini boshqa zavod va brendlar qoplab berdi.
Cobalt yarim yilda 26,6 mingta savdoni yo‘qotdi
Cobalt hali ham O‘zbekistonda eng ko‘p sotilayotgan yengil avtomobil. Ammo uning bozordagi ustunligi keskin qisqardi.
2025-yilning birinchi yarmida mamlakatda sotilgan har o‘nta avtomobilning qariyb to‘rttasi Cobalt edi. Modelning umumiy bozordagi ulushi 39,2 foizni tashkil qilgan.
2026-yilda bu ko‘rsatkich 23,3 foizga tushdi. Endi sotilayotgan har to‘rtta avtomobilning bittasidan sal kamrog‘i Cobalt hissasiga to‘g‘ri kelmoqda.
Damas, Damas 3 va Labo hisobdan chiqarilsa, o‘zgarish yanada yaqqol ko‘rinadi. 2025-yilda Cobalt ushbu hisobdagi bozorning 54,4 foizini egallagan. Ya’ni Damas va Labosiz sotilgan har ikkinchi avtomobil Cobalt edi.
Bir yil o‘tib, modelning ulushi 34 foizgacha kamaydi. Endi Cobalt bozorning yarmidan ko‘pini emas, taxminan uchdan birini egallamoqda.
Bu pasayish avtomobil taqchilligi bilan izohlanmaydi. Cobaltni hozir avvalgidek oylab kutish shart emas. Mashinalar salonlarda bor, ishlab chiqaruvchi va banklar esa xaridni yengillashtiradigan moliyaviy dasturlarni taklif qilmoqda.
Ipoteka-bank iyul oyida Cobalt Special avtokreditini ishga tushirdi. Dastur bo‘yicha boshlang‘ich to‘lov 30 foizdan, yillik stavka 21 foizdan boshlanadi, kredit muddati esa besh yilgacha. Biroq dastur ikkinchi yarim yillikda boshlangan, shu sababli uni yanvar-iyun natijalariga ta’sir qilgan omil sifatida ko‘rsatib bo‘lmaydi.
Damas va Labo Chevroletdagi pasayishni yumshatdi
Chevroletning umumiy savdosi 4,2 foizga kamaygani unchalik katta pasayishdek ko‘rinmasligi mumkin. Ammo bu natijani tijorat avtomobillari ushlab turibdi.
2026-yilning birinchi yarmida:
- 34 286 dona Damas;
- 19 723 dona Labo;
- 853 dona Damas 3 sotildi.
Bu uch modelning umumiy savdosi 54 862 donaga yetdi. Bir yil avval Xorazm zavodida ishlab chiqarilgan Damas va Labo savdosi 47 921 donani tashkil qilgan edi. O‘sish 14,5 foizga teng.
Damas, Damas 3 va Labo chiqarib tashlansa, Chevrolet uchun manzara ancha og‘ir.
2025-yilning birinchi yarmida UzAuto Motors 94 048 dona yengil avtomobil sotgan. 2026-yilda bu ko‘rsatkich 81 210 donaga tushdi. Pasayish 12 838 dona yoki 13,7 foizni tashkil qildi.
Damas va Labosiz hisoblangan bozorning o‘zi 3,1 foizga qisqargan. Chevrolet esa bozordan to‘rt baravar tezroq pasaygan.
Natijada Chevroletning ushbu hisobdagi ulushi 75,6 foizdan 67,4 foizga tushdi. Bir yil ichida brend 8,2 foiz punkt yo‘qotdi.
Shunday qilib, Damas va Laboning o‘sishi Chevrolet yengil avtomobillaridagi ancha jiddiy pasayishni umumiy raqamlarda yumshatib turibdi.
Onix ikki baravardan ko‘proq o‘sdi
Cobalt pasaygan bir paytda Chevroletning boshqa ikki ommaviy modeli o‘sdi.
Onix sotuvi 2025-yilning birinchi yarmidagi 8 704 donadan 19 595 donaga yetdi. Model bir yil ichida 2,25 baravar o‘sdi va Trackerga deyarli yetib oldi.
Tracker savdosi 16 641 donadan 20 274 donaga ko‘paydi. O‘sish qariyb 22 foizni tashkil etdi.
Hozir Onix va Tracker o‘rtasidagi farq atigi 679 dona. Bir yil avval esa Tracker Onixdan deyarli ikki baravar ko‘p sotilgan edi.
Onix va Tracker birgalikda 14 524 dona qo‘shimcha savdo olib keldi. Lekin bu ham Cobalt yo‘qotgan 26 644 donani qoplashga yetmadi.
Sonet to‘rtinchi o‘rinda qoldi
Kia Sonet 2026-yilning birinchi yarmida 9 653 dona sotildi. O‘tgan yilning shu davrida model savdosi 7 873 donani tashkil qilgan edi.
Sonet qariyb 23 foiz o‘sdi va O‘zbekistonda eng ko‘p sotilayotgan yengil avtomobillar orasida to‘rtinchi o‘rinni saqlab qoldi. Uning oldida faqat Cobalt, Tracker va Onix bor.
Kia brendining umumiy savdosi 11 361 donadan 12 286 donaga yetib, 8 foizga oshdi.
O‘zbekistonda eng ko‘p sotilgan yengil avtomobillar
Damas, Damas 3 va Labo tijorat transporti bo‘lgani uchun reytingga kiritilmadi.
| O‘rin | Model | 2025-yil | 2026-yil | O‘zgarish |
|---|---|---|---|---|
| 1 | Chevrolet Cobalt | 67 580 | 40 936 | −39,4% |
| 2 | Chevrolet Tracker | 16 641 | 20 274 | +21,8% |
| 3 | Chevrolet Onix | 8 704 | 19 595 | 2,25 baravar |
| 4 | Kia Sonet | 7 873 | 9 653 | +22,6% |
| 5 | BYD Song Plus DM-i | 3 053 | 5 630 | +84,4% |
| 6 | BYD Yuan-Up EV | 1 937 | 4 277 | 2,2 baravar |
| 7 | BYD Chazor | 2 076 | 3 771 | +81,6% |
| 8 | Haval M6 | 2 001 | 2 095 | +4,7% |
| 9 | Chery Tiggo 7 Pro | 1 617 | 1 557 | −3,7% |
| 10 | Haval Jolion | 1 237 | 1 480 | +19,6% |
Reytingning dastlabki to‘rt o‘rni o‘zgarmagan. Ammo birinchi uchlik ichidagi farq ancha qisqardi.
Cobalt yetakchilikni saqlab qoldi, biroq qariyb 40 foiz savdoni yo‘qotdi. Onix Trackerga yaqinlashdi, Sonet esa barqaror o‘sib, to‘rtinchi o‘rinda qoldi.
Haval Jolion kuchli o‘nlikka kirdi. Elektr Yuan-Up esa sakkizinchi o‘rindan oltinchi o‘ringa ko‘tarildi.
Song Plus Champion DM-i va Song Plus DM-i UzPride bir model sifatida hisoblandi. Elektr Yuan-Up va gibrid Yuan-Up DM-i esa texnik jihatdan boshqa-boshqa avtomobillar. 2026-yilda gibrid Yuan-Up DM-i’dan 1 271 dona sotilgan, bu raqam elektromobil natijasiga qo‘shilmadi.
ADM Jizzakh va BYD savdosi oshdi
ADM Jizzakh 2026-yilning birinchi yarmida 21 743 dona avtomobil sotdi. Bir yil avval bu ko‘rsatkich 19 672 dona edi. Zavod savdosi 10,5 foizga oshdi.
Korxona portfelidagi brendlar quyidagicha natija ko‘rsatdi:
- Kia — 12 286 dona;
- Chery — 4 820 dona;
- Haval — 4 402 dona;
- Changan — 235 dona.
Kia savdosi 8 foiz, Chery qariyb 4,5 foiz, Haval esa 19 foizga oshdi. Changan 2026-yilda zavod statistikasida yangi brend sifatida paydo bo‘ldi.
BYD Uzbekistan Factory savdosi 9 708 donadan 17 012 donaga yetdi. O‘sish 75 foizni tashkil etdi.
Song Plus DM-i savdosi 3 053 donadan 5 630 donaga, Chazor 2 076 donadan 3 771 donaga oshdi. Elektr Yuan-Up esa 1 937 donadan 4 277 donaga yetib, 2,2 baravar o‘sdi.
Bozorni oylik to‘lov harakatlantiryapti
«O‘zavtosanoat» statistikasi avtomobillarning qanchasi naqd pulga, qanchasi kredit yoki bo‘lib to‘lash orqali sotilganini ko‘rsatmaydi. Shu sababli har bir modeldagi o‘sishni bevosita muayyan bank dasturiga bog‘lash mumkin emas.
Ammo bozordagi takliflarga qaralsa, asosiy raqobat avtomobil narxidan oylik to‘lovga ko‘chganini ko‘rish mumkin.
Chevrolet Onix va Tracker uchun yillik 0 foizli dasturlar mavjud. Ayrim takliflarda avtomobillarni 60 oygacha muddatga foizsiz xarid qilish mumkin. Shartlar boshlang‘ich to‘lov miqdori va tanlangan bankka bog‘liq.
Kia Sonet uchun 24 oygacha foizsiz muddatli to‘lov taklif qilinmoqda. Brendning rasmiy saytida Sonet uchun stavkasi 0 foizdan boshlanadigan, muddati besh yilgacha bo‘lgan kredit dasturlari ham ko‘rsatilgan.
BYD avtomobillari uchun standart kredit stavkalari 18,9 foizdan boshlanadi. Ipoteka-bankning Super BYD dasturida esa boshlang‘ich to‘lov va muddatga qarab stavka 0 foizdan 21,9 foizgacha, kredit muddati besh yilgacha belgilangan.
Foizsiz taklif har doim avtomobil arzonroq tushishini anglatmaydi. Ayrim dasturlarda katta boshlang‘ich to‘lov talab qilinadi, chegirma bekor bo‘ladi yoki sug‘urta majburiy bo‘ladi. Lekin ko‘pchilik xaridor uchun shartnomadagi yakuniy summa emas, har oy qancha to‘lash kerakligi muhimroq.
Shu sababli xaridor Cobalt uchun kredit olish o‘rniga, oylik to‘lovdagi uncha katta bo‘lmagan farq evaziga Onix, Tracker, Sonet yoki BYD modeliga o‘tishi mumkin.
Cobalt hali birinchi, ammo bozor endi faqat Cobaltdan iborat emas
O‘zbekiston avtomobil bozori 2026-yilning birinchi yarmida deyarli o‘smadi. Sotuv atigi 1,8 foizga ko‘paydi. Damas va Labo chiqarib tashlansa, bozor aksincha qisqargan.
Shu fonda Cobalt 26,6 mingta savdoni yo‘qotdi, Onix ikki baravardan ko‘proq o‘sdi, Tracker va Sonet 20 foizdan ortiq qo‘shdi. Chevroletdan boshqa ishlab chiqaruvchilar esa birgalikda qariyb 30 foiz o‘sdi.
Bu xaridorlarning birdan boyib ketgani yoki avtomobilga umumiy talab keskin oshganini anglatmaydi. Bozordagi pul boshqa modellar o‘rtasida qayta taqsimlanyapti.
Cobalt hali ham mamlakatning eng ko‘p sotiladigan yengil avtomobili. Chevrolet ham bozordagi yetakchiligini saqlab turibdi. Ammo eski ustunlik tobora qisqarmoqda.
Endi xaridor faqat mashinaning narxiga qaramayapti. U boshlang‘ich to‘lovni, kredit muddatini va har oy to‘laydigan summasini solishtiryapti. Shu hisobda qimmatroq, ammo zamonaviyroq avtomobillar Cobaltga tobora yaqinlashmoqda.
