BYD Song Plus arzonladi: «UzPride» bizga qanchaga tushyapti?
BYD Factory Uzbekistan zavodida mahalliylashtirilgan BYD Song Plus UzPride taqdim qilindi. Narx 13 million so‘mga pasaydi, ammo baribir Xitoydagi yangi Smart Drive versiyasidan 7 ming dollar qimmatroq turadi.
BYD Narxlari: Song Plus UzPride
BYD Uzbekistan mahalliy yig‘uv hisobiga BYD Song Plus narxini tushirdi. Model “UzPride” — “O‘zbekiston g‘ururi” degan nom oldi. Lekin bu “g‘urur” o‘zbek haydovchisi uchun arzonga tushmayapti.
BYD Song Plus UzPride Narxi
O‘zbekistonda BYD Song Plus UzPride ikkita pozitsiyada sotilmoqda:
| SONG PLUS DM-i UzPride 2025 Narxi | 110km Flagship | 150km Flagship |
|---|---|---|
| Цена | 374,100,000 сум | 396,600,000 сум |
Ularning opsiyalari Xitoydagi Song Plus Champion dm-i bilan bir xil, ammo global bozorga chiqqan so‘nggi Smart Drive versiyasi bilan solishtirganda qator funksiyalar yetishmaydi.
BYD Song Plus UzPride’da yo‘q opsiyalar
UzPride’dagi yagona yangi imkoniyat — o‘zbek tilidagi ovozli yordamchi. U haydovchining talaffuzi va shevasiga moslashadi.
Afsuski, innovatsialar shu bilan tugaydi. UzPride — bu aslida 2023-yilgi BYD Song Plus Champion modelining o‘zi. Unda global bozorda allaqachon mavjud bo‘lgan muhim yangilanishlar yo‘q:
- HUD-displey (old oynaga proyeksiya)
- Yangilangan podveska va g‘ildirak disklari
- Yangi salon ranglari
- Isitiladigan rul
- Smart Drive (“Xudoning ko‘zi”) avtopiloti
Davlat imtiyozlari va yashirin qo‘llab-quvvatlash
BYD Uzbekistan Factory davlatdan misli ko‘rilmagan darajada imtiyoz olmoqda:
- Bojxona to‘lovlaridan ozod qilingan
- Utilizatsiya yig‘imidan ozod qilingan
Rasmiy ma’lumotlarga ko‘ra, zavod 274,4 milliard so‘mlik imtiyoz olgan. Bu — zavod to‘lagan soliqlardan 8 baravar ko‘p. Hisoblab ko‘rsak, O‘zbekistonda sotilgan har bir BYD avtomobiliga davlat tomonidan 40 million so‘mdan ortiq yordam to‘g‘ri kelmoqda.
Shu bilan birga, 2024-yil oxiridan boshlab elektromobil importiga qo‘yiladigan talablar keskin kuchaytirildi, 2025-yil 1-maydan esa importyorlar uchun utilizatsion yig‘im ancha oshirildi. Natijada BYD ichki bozorni deyarli monopoliya holatida egallab oldi.
Shu bilan birga, hukumat importyorlar uchun utilizatsiya yig‘imini oshirib, BYD uchun raqobatni chekladi.
Zavod esa MChJ shaklida ishlagani uchun moliyaviy hisobotni e’lon qilishga majbur emas.
O‘zbekistonda nimalar ishlab chiqarilmoqda?
«Gazeta» manbalariga ko‘ra, UzPride uchun quyidagi qismlar O‘zbekistonda ishlab chiqariladi:
- Bamperlar
- Oynalar
- O‘rindiqlar
- Salon va kuzovning plastik detallari
- Shovqin izolyatsiyasi materiallari
- Yoqilg‘i baklari
Djizzaxdagi zavodda kuzovlarni payvandlash va bo‘yash ishlari ham amalga oshirilmoqda. Biroq dvigatel, podveska, elektronika, boshqaruv paneli va eshik kartalari Xitoydan tayyor holda olib kelinadi. BYD Central Asia nazorat global standartlarga muvofiq ekanini ta’kidlamoqda.
“Mahalliylashtirish” darajasi qanchalik?
Ko‘rgazmada namoyish qilingan avtomobil raqami uchun mo‘ljallangan teshiklar hanuz Xitoy standarti bo‘yicha edi.
Bu arzimas detaldek tuyulsa ham, aslida mahalliylashtirish qanchalik “sayoz” ekanini ko‘rsatib turibdi.
Xulosa
Ha, BYD Song Plus UzPride narxi 13 mln so‘mga tushdi. Lekin u baribir Xitoydagi yangi modellardan qimmat, imkoniyatlari esa kam. Davlat tomonidan berilayotgan ulkan imtiyozlar evaziga “UzPride” bizga ortiqcha narx va qisqartirilgan opsiyalar bilan qaytmoqda.
