Yangi Damas 3 Narxi qancha turadi?

O‘zbekistonda yangi «arzon» 7 o‘rinli avtomobil ishlab chiqarishni yo‘lga qo‘yish rejalashtirilmoqda. UzAuto Motors tomonidan Xorazmda tashkil etiladigan yangi zavodda ishlab chiqariladigan ushbu model, kutilishicha, Yevro-5 ekologik standartlariga mos bo‘ladi. Ammo oldingi loyihalardan kelib chiqib, bu modelning narxi, ko‘pchilik kutganidek, arzon bo‘lishi dargumon.

Chevrolet N400 — yangi Damas bo‘ladimi?

Yangi «Damas» uchun asosiy nomzod sifatida Wuling Hongguang V ko‘rib chiqilmoqda. Bu model ba’zi bozorlarda Chevrolet Tornado Van yoki Chevrolet N400 nomi ostida sotiladi.

Biroq, shunisi qiziqki, N400 Chevrolet emblemasi bilan sotilayotgan bo‘lsa-da, aslida bu avtomobil Wuling Motorstomonidan ishlab chiqariladi. Wuling – SAIC-GM-Wuling (SGMW) konsorsiumining bir qismi bo‘lib, 2002 yildan buyon General Motors, SAIC Motor va Wuling Motors kompaniyalari o‘rtasidagi uch tomonlama hamkorlik asosida avtomobillar ishlab chiqaradi.

Aslida, N400 hech qanday Chevrolet yoki General Motors injiniringiga ega emas. Bu to‘liq Xitoyda ishlab chiqarilgan, keyin esa eksport qilingan model.

Texnik xususiyatlar

N400 1,2 litrli, 82 ot kuchiga ega DOHC dvigateli bilan jihozlangan bo‘lib, 5 bosqichli mexanik uzatmalar qutisi bilan ishlaydi. Asosiy konfiguratsiyada quyidagilar mavjud:

• Matodan ishlangan salon

• 14 dyuymli po‘lat disklar

• Mexanik old oynalar

• Oddiy AM/FM radioga ega audio tizim (2 ta dinamik)

• Ikkinchi qator o‘rindiqlarni buklash imkoniyati

• ABS va EBD tizimlari

Narxi qancha bo‘ladi?

Xitoyda N400 ning boshlang‘ich narxi taxminan 6,500 dollar atrofida. O‘zbekistonda esa, shaxsiy import qiluvchilar tomonidan olib kirilgan N400 uchun 180 mln so‘m yoki 14,000 dollar talab qilinadi. Bu yuqori narx, asosan, 1,5 litrli dvigatelli avtomobillarga qo‘yilgan bojlar, 12% QQS va sertifikatlash xarajatlari bilan bog‘liq.

Ammo, UzAuto Motors kabi mahalliy ishlab chiqaruvchilar bojxona imtiyozlari, soliqdan ozod etish va utilizatsiya yig‘imidan ozod qilish imkoniyatiga ega bo‘lganligi sababli, yangi model narxi 10,000 dollar atrofida bo‘lishi mumkin.

Haqiqiy narx qanday bo‘ladi?

Lekin hamma narsa shunchalik oddiy emas…

Masalan, 2025 yilning yanvarida Asaka Motors zavodida ishlab chiqarila boshlangan Wuling N111 modeli bunga misol bo‘la oladi. Ushbu model Xitoyda 5,500 dollar turadi, lekin O‘zbekistonda uning narxi 126 mln so‘m (taxminan 9,700 dollar) ni tashkil etadi – ya’ni deyarli ikki baravar qimmat.

Shuni inobatga olsak, yangi Damas 3 ning narxi ham o‘xshash tarzda ikki baravar oshishi ehtimoldan xoli emas. Agar bu model ham import qilingan holda boshlang‘ich bosqichda sotilsa, narx 150 mln so‘m yoki taxminan 12,000 dollaratrofida bo‘lishi mumkin.

Nega bu qimmat?

Bu yuqori narx asosan avtomobil zavodlariga taqdim etiladigan ko‘plab imtiyozlar bilan bog‘liq. Asaka Motors, xuddi boshqa mahalliy avtomobil zavodlari kabi, bojxona imtiyozlari, utilizatsiya yig‘imidan ozod qilish va boshqa soliq yengilliklariga ega. Bularning barchasi O‘zbekiston soliq to‘lovchilarining hisobidan moliyalashtiriladi. Shu bois, ishlab chiqaruvchilar odatda import qilingan komponentlarni avval to‘liq yig‘ib, keyinchalik mahalliy ishlab chiqarishga o‘tadilar.

«Uzavtosanoat» izohi

Mazkur mavzuga «Daryo» nashri orqali munosabat bildirgan «Uzavtosanoat» vakillari quyidagicha izoh berdi:
«Yangi model maqsadli iste’molchilarning istak va ehtiyojlarini inobatga olgan holda tanlanadi. Ayni paytda texnik xususiyatlarning mahalliy foydalanish sharoitlariga mosligi, ishonchliligi va qulayligi bo‘yicha potensial avtomobil modellari o‘rganilmoqda.»

Shuningdek, kompaniya mos keladigan model tanlab olingach, uning O‘zbekistonda ishlab chiqarilishi haqida rasmiy axborot tarqatilishini qo‘shimcha qilgan.

Xulosa: Arzon Damas orzusi hali uzoqda. Me’yoriy imtiyozlar va yuqori narxlar inobatga olinganda, yangi modelning asl narxi odatiy Damasdan ancha qimmat bo‘lishi mumkin.